Commemoratio Sancti Michaelis Archangeli
Alia Oratio ad Sanctum Michael
Commemoratio Sancti Gabrielis Archangeli
Commemoratio Sancti Raphaelis Archangeli
Ad Sanctum Raphaelem Archangelum
Christe, sanctorum decus Angelorum
Custodes hominum psallimus Angelos
Sancti Angeli, custodes nostri, defendite nos in praelio, ut non pereamus in tremendo iudicio.
V. In conspectu Angelorum psallam tibi, Deus meus.
R. Adorabo ad templum sanctum tuum et confitebor nomini tuo.
Deus, qui ineffabili providentia sanctos Angelos tuos ad nostram custodiam mittere digneris, largire supplicibus tuis, et eorum semper protectione defendi, et aeterna sociate gaudere. Per Dominum nostrum Iesum Christum.
Exaudi nos, Domine sancte, Pater omnipotens, aeternae Deus: et mittere digneris sanctum Angelum tuum de caelis, qui custodiat, foveat, protegat, visitet atque defendat omnes habitantes in hoc habitaculo. Per Christum Dominum nostrum. Amen.
Princeps gloriossime, Michael Archangele, esto memor nostri : hic et ubique semper precare pro nobis Filium Dei, alleluia, alleluia.
V. In conspectu Angelorum psallam tibi, Deus meus.
R. Adorabo ad templum sanctum tuum et confitebor nomini tuo.
Deus, qui miro ordine, Angelorum ministeria hominumque dispensas : concede propitius ut, a quibus tibi ministrantibus in caelo assistitur, ab his in terra vita nostra muniatur. Per Dominum nostrum Iesum Christum.
Sancte Michael Archangele, defende nos in proelio, contra nequitiam et insidias diaboli esto praesidium. Imperet illi Deus, supplices deprecamur: tuque, Princeps militiae coelestis, Satanam aliosque spiritus malignos, qui ad perditionem animarum pervagantur in mundo, divina virtute, in infernum detrude. Amen.
Princeps gloriosissime caelestis militiae, sancte Michael Archangele, defende nos in praelio et colluctatione, quae nobis adversus principes et potestates, adversus mundi rectores tenebrarum harum, contra spiritualia nequitiae, in caelestibus. Veni in auxilium hominum, quos Deus creavit inexterminabiles, et ad imaginem similitudinis suae fecit, et a tyrannide diaboli emit pretio magno. Proeliare hodie cum beatorum Angelorum exercitu praelia Domini, sicut pugnasti contra ducem superbiae luciferum, et angelos eius apostaticos: et non valuerunt, neque locus inventus est eorum amplius in coelo. Sed proiectus est draco ille magnus, serpens antiquus, qui vocatur diabolus et satanas, qui seducit universum orbem; et proiectus est in terram, et angeli eius cum illo missi sunt.
En antiquus inimicus et homicida vehementer erectus est. Transfiguratus in angelum lucis, cum tota malignorum spirituum caterva late circuit et invadit terram, ut in ea deleat nomen Dei et Christi eius, animasque ad aeternae gloriae coronam destinatas furetur, mactet ac perdat in sempiternum interitum. Virus nequitiae suae, tamquam flumen immundissimum, draco maleficus transfundit in homines depravatos mente et corruptos corde; spiritum mendacii, impietatis et blasphemiae; halitumque mortiferum luxuriae, vitiorum omnium et iniquitatum.
Ecclesiam, Agni immaculati sponsam, faverrrimi hostes repleverunt amaritudinibus, inebriarunt absinthio; ad omnia desiderabilia eius impias miserunt manus. Ubi sedes beatissimi Petri et Cathedra veritatis ad lucem gentium constituta est, ibi thronum posuerunt abominationis et impietatis suae; ut percusso Pastore, et gregem disperdere valeant.
Adesto itaque, Dux invictissime, populo Dei contra irrumpentes spirituales nequitias, et fac victoriam. Te custodem et patronum sancta veneratur Ecclesia; te gloriatur defensore adversus terrestrium et infernorum nefarias potestates; tibi tradidit Dominus animas redemptorum in superna felicitate locandas. Deprecare Deum pacis, ut conterat satanam sub pedibus nostris, ne ultra valeat captivos tenere homines, et Ecclesiae nocere. Offer nostras preces in conspectu Altissimi, ut cito anticipent nos misericordiae Domini, et apprehendas draconem, serpentem antiquum, qui est diabolus et satanas, ac ligatum mittas in abyssum, ut non seducat amplius gentes. Hinc tuo confisi praesidio ac tutela, sacri ministerii nostri auctoritate [si fuerit laicus, vel clericus qui ordinem exorcistatus nondum suscepit, dicat: sacra sanctae Matris Ecclesiae auctoritate], ad infestationes diabolicae fraudis repellendas in nomine Iesu Christi Dei et Domini nostri fidentes et securi aggredimur.
V. Ecce Crucem Domini, fugite partes adversae.
R. Vicit Leo de tribu Iuda, radix David.
V. Fiat misericordia tua, Domine, super nos.
R. Quemadmodum speravimus in te.
V. Domine, exaudi orationem meam.
R. Et clamor meus ad te veniat.
Si fuerit saltem diaconus subiungat
V. Dominus vobiscum.
R. Et cum spiritu tuo.
Oremus
Deus, et Pater Domini nostri Iesu Christi, invocamus nomen sanctum tuum, et clementiam tuam supplices exposcimus ut, per intercessionem immaculatae semper Virginis Dei Genitricis Mariae, beati Michaelis Archangeli, beati Ioseph eiusdem beatae Virginis Sponsi, beatorum Apostolorum Petri et Pauli et omnium Sanctorum, adversus satanam, omnesque alios immundos spiritus, qui ad nocendum humano generi animasque perdendas pervagantur in mundo, nobis auxilium praestare digneris. Per eumdem Christum Dominum nostrum. Amen.
Kyrie, eleison. Kyrie, eleison.
Christe, eleison. Christe, eleison.
Kyrie, eleison. Kyrie, eleison.
Christe, audi nos. Christe, audi nos.
Christe, exaudi nos Christe, exaudi nos
Pater de caelis Deus, miserere nobis.
Fili Redemptor mundi, Deus, miserere nobis.
Spiritus Sancte, Deus, miserere nobis.
Sancta Trinitas, unus Deus, miserere nobis.
Sancta Maria, Regina Angelorum, ora pro nobis.
Sancte Michael, ora pro nobis.
Sancte Michael, sapientiae divinae fons abundans, ora pro nobis.
Sancte Michael, divini Verbi adorator perfectissime, ora pro nobis.
Sancte Michael, quem gloria et honore Deus coronavit, ora pro nobis.
Sancte Michael, caelestis exercitus princeps potentissime, ora pro nobis.
Sancte Michael, Trinitatis sanctissimae signifer, ora pro nobis.
Sancte Michael, paradisi custos, ora pro nobis.
Sancte Michael, dux et consolator populi Dei, ora pro nobis.
Sancte Michael, splendor et fortitudo militantis Ecclesiae, ora pro nobis.
Sancte Michael, honor et gaudium triumphantis Ecclesiae ora pro nobis.
Sancte Michael, lumen Angelorum, ora pro nobis.
Sancte Michael, praesidium orthodox populi, ora pro nobis.
Sancte Michael, sub signo Crucis militantium fortitudo, ora pro nobis.
Sancte Michael, lux et spes animarum in agone mortis, ora pro nobis
Sancte Michael, auxilium tutissimum, ora pro nobis.
Sancte Michael, in adversitatibus nostris adiutorium, ora pro nobis
Sancte Michael, aeternarum sententiarum proclamator, ora pro nobis
Sancte Michael, consolator animarum in purgatorio languentium, ora pro nobis
Sancte Michael, animas electorum post mortem suscipiens, ora pro nobis
Sancte Michael, princeps noster, ora pro nobis.
Sancte Michael, defensor noster, ora pro nobis.
Agnus Dei, qui tollis peccata mundi, parce nobis, Domine.
Agnus Dei, qui tollis peccata mundi, exaudi nos, Domine.
Agnus Dei, qui tollis peccata mundi, miserere nobis.
V. Ora pro nobis, Sancte Michael Archangele
R. Ut digni efficiamur promissionibus Christi.
Oremus.
Domine Iesu Christe, benedictione perpetua sanctifica nos, et concede, per intercessionem sancti Michaelis illam sapientiam quae doceat nos thesaurisare thesaurum in caelis, et pro temporalibus, aeterna bona eligere. Qui vivis et regnas in saecula saeculorum.
R. Amen
Princeps gloriossime, Gabrielis Archangele, esto memor nostri : hic et ubique semper precare pro nobis Filium Dei, alleluia, alleluia.
V. Stetit Angelus iuxta aram templi.
R. Habens thuribulum aurem in manu sua.
Deus, qui inter ceteros Angelos, ad annuntiandum incarnationis tuae mysterium, Gabrielem Archangelum elegisti; concede propitius, ut qui festum eius celebramus in terris, ipsius patrocinium sentiamus in caelis: qui vivis et regnas in saecula saeculorum. Amen.
Princeps gloriossime, Raphaelis Archangele, esto memor nostri : hic et ubique semper precare pro nobis Filium Dei, alleluia, alleluia.
V. Stetit Angelus iuxta aram templi.
R. Habens thuribulum aurem in manu sua.
Deus, qui beatum Raphaelem Archangelum Tobiae famulo tuo comitem dedisti in via : concede nobis famulis tuis; ut eiusdem semper protegamur custodia et muniamur auxilio. Per Dominum nostrum Iesum Christum.
Dirigere dignare, Domine Deus, in adiutorium nostrum, sanctum Raphaelem Archangelum; et quem tuae maiestati semper assistere credimus, tibi nostras exiguas preces benedicendas assignet. Per Christum Dominum nostrum. Amen.
Angele Dei,
qui custos est mei,
Me tibi commissum pietate superna;
(Hac nocte, Hodie) illumina, custodi, rege, et guberna.
Amen.
Credo quod sis angelus sanctus, a Deo omnipotente ad custodiam mei deputatus. Propterea peto, et per illum qui te ad hoc ordinavit, humiliter imploro, ut me miseram fragilem atque indignam semper et ubique in hac vita custodias, protegas a malis omnibus atque defendas, et cum Deus hinc animam meam migrare iusserit, nullam in ea potestatem daemonibus habere permittas, sed tu eam leniter a corpore suscipias, et in sinu Habrae suaviter useque perducas iubente ac iuvante creatore ac salvatore Deo nostro, qui est benedictus in saecula saeculorum. Amen.
Christe, sanctorum decus Angelorum
Rector humani generis et auctor,
nobis aeternum tribue benigne
scandere caelum.
Angelum pacis, Michael ad istam
caelitus mitte, rogitamus aulam:
nobis ut crebro veniente crescant
prospera cuncta.
Angelus fortis Gabriel, ut hostem
pellat antiquum, volitet ab alto,
saepius templum veniat ad istud
visere nostrum.
Angelum nobis medicum salutis
mitte de caelis Raphael, ut omnes
sanet aegrotos, pariterque nostros
dirigat actus.
Hinc Dei nostri Genetrix Maria,
totus et nobis chorus Angelorum
semper assistat, simul et beata
concio tota.
Praestet hoc nobis Deitas beata
Patris ac Nati pariterque Sancti
Spiritus, cuius resonat per omnem
gloria mundum. Amen.
Custodes hominum psallimus Angelos,
naturae fragili quos Pater addidit
caelestis comites, insidiantibus
ne succumberet hostibus.
Nam, quod corruerit proditor angelus,
concessis merito pulsus honoribus,
ardens invidia, pellere nititur
quos caelo Deus advocat.
Huc, custos, igitur pervigil advola,
avertens patria de tibi credita
tam morbos animi, quam requiescere
quidquid non sinit incolas.
Sanctae sit Triadi laus pia iugiter,
cuius perpetuo numine machina
triplex haec regitur, cuius in omnia
regnat gloria saecula. Amen.
Orbis patrator optime
qui, quidquid est, potentia
magna creasti, nec regis
minore providentia:
Adesto supplicantium
tibi reorum coetui,
lucisque sub crepusculum
lucem novam da mentibus.
Tuusque nobis Angelus,
signatus ad custodiam,
hic adsit, a contagio
qui criminum nos protegat.
Serpentis nobis aemuli
calumnias exterminet,
ne rete fraudulentiae
incauta nectat pectora.
Metum repellat hostium
nostris procul de finibus:
pacem procuret civium,
fugetque pestilentiam.
Deo Patri sit gloria,
qui, quos redemit Filius,
et Sanctus unxit Spiritus,
per Angelos custodiat. Amen.
Te splendor et virtus Patris
Te vita, Iesu, cordium,
ab ore qui pendent tuo,
laudamus inter Angelos.
Tibi mille densa millium
ducum corona militat;
sed explicat victor Crucem
Michael salutis Signifer.
Draconis hic dirum caput
in ima pellit tartara,
ducemque cum rebellibus
caelesti ab arce fulminat.
Contra ducem superbiae
sequamur hunc nos Principem,
ut detur ex Agni throno
nobis corona gloriae.
Patri, simulque Filio,
tibique, Sancte Spiritus,
sicut fuit, sit iugiter
saeculum per omne gloria. Amen.
Princeps gloriosissime Michael Archangele, esto memor nostri; hic et ubique semper precare pro nobis Filium Dei.
V. In conspectu Angelorum psallam tibi, Deus meus:
R. Adorabo ad templum sanctum tuum, et confitebor nomini tuo.
Oremus. Deus, qui miro ordine Angelorum ministeria hominumque dispensas, concede propitius, ut a quibus tibi ministrantibus in caelo semper assistitur, ab his in terra vita nostra muniatur. Per Christum Dominum nostrum. Amen.